Bingo King News: Broadchurch 小鎮疑雲

Broadchurch 小鎮疑雲

不開心, 人人不開心

bingoking:
講電視劇的確係一件唔易既事.篇幅長支節多.最好當然集集睇完就寫啦.不過人就係甘懶....

第一次聽到呢套野係響電台節目"口水多過浪花"do姐提左四五次話好好睇.睇到追上癮甘而留意,名人介紹總要了解一下.

Broadchurch - 英國ITV頻度, 香港未播, DVD出左, 內地譯"小鎮疑雲"算OK架啦.又唔係咩官方譯名, 全八集.每集約50分鐘

故事開始好直接, 一個英國偏遠又細既小鎮,清晨於海灘,發現一個小童屍體, 為此小鎮帶來種種既鄰里不安.由一個城市調來既潦倒又身體唔好既警探夥拍一個當地阿嬸警探去查, 基本上除了第一集因為人物介紹而悶D, 之後七集,一集一個疑犯去查,總之就個個都疑神疑鬼,呢方面都比佢玩到盡,查到最後一集真相大白.係緊張既.英國佬呢方面好野既.寫人性是一流.

每個人,也有一段不想回憶的秘密

以現代呢D故弄玄虛既偵探故事,我早早放棄"猜誰是兇手"去睇, 因為分分鐘編劇們都係唔想你估,甘咪唔好估,由你帶我去遊花園.所以第一集第一個開首就係受害者父親既master shot(好似用左五六分鐘)去由佢介紹呢個鎮,同將會有關聯既疑犯.真係遊花園甘遊.

第一集真係難頂D,又有小小悶悶, 英式節奏刻意既慢.真係要捱過去,而佢既拍攝手法都係慢慢推進,沒有什麼好勁既高潮位,
每集都係承接上集末段出現既疑犯, 今集解出疑犯的一段極想忘記的過去(秘密),解出大家都係怕內心秘密一公開,社區就不接受自己,所以大家也不想去談自己的過去,之後又在片末帶出下一個疑犯, 重復七次, 直至結局.有電視劇追看性是OK.因為寫偵破案件變了其次, 寫人性才是主菜.

此劇涉獵很多社會議題;其中涉及現代公眾輿論, 城市記者為了重振聲威,及死纏潦倒警探,特意來小鎮,作煽情式報導,惹起更多關注, 因為不深入及猜測的報導令老人疑犯枉死. 婚外情;利益道德;悲慘既倫常關係令兩母子, 帶來扭曲的價值觀;學校的欺凌;孌童廦..等

當中孌童與愛情, 回想起來差不多是主線.什麼是孌童?年輕教師戀上女學生,被揭發定罪入獄, 出獄後即娶該女學生, 仍是孌童嗎?經歷喪子之後,喜愛輕擁一下鎮上小孩,是懷念永不可成長的兒子之痛,又是否孌童?

猜疑就成了此鎮不息出現的命題.全劇也是愁雲慘霧一片.看後很不開心,偏偏又想看下去, 始終是八集劇,我也想弄清什麼一回事?全劇基本上個個都唔開心,又有不堪回首的過去呀,陰暗面, 大至老人,細至小朋友都有, 真係編劇照顧周到...當我以為本劇唯一一個人無事既, 最多只係替別人悲傷既警探阿嬸, 原來最後佢都走唔甩,...好野..英國佬..你玩哂..

本來睇個樣拍完就算,不過收視大勝同口啤極佳, 所以話會開第二季.我唔知係用同一個鎮定同一個警探去延續, 因為呢八集已經寫盡左呢個鎮, 真係唔知點有第二季.睇下2014啦下..

cast:

左:David Tennant, 右Olivia Colman

David Tennant飾演就係果個又潦倒又身體唔好既警探,佢成名作當然係Doctor Who (2005版)本來靚靚仔仔...呢套野佢就由頭污槽頹到尾.係既..靚仔通常都係甘話比人知.佢唔止有靚仔.仲識演戲, 我明我明..

Olivia Colman飾演當地警探阿嬸, 全片佢都係娘,土既造型, 佢都唔係咩靚女,所以專心演戲,佢基本上由頭帶到尾,佢基本上先係主角,成個故事每part都關佢事.佢係做得好既.